Bakı, 7 iyul
İyulun 7-də Bakı Hərbi Məhkəməsində davam etdirilən məhkəmə prosesində zərərçəkmiş şəxs, Kərkicahan qəsəbəsinin sakini Dərgah Haqverdiyev ifadə verib. O, 1987-ci ildən etibarən ermənilər tərəfindən Xankəndi şəhərində yaşayan azərbaycanlı əhaliyə qarşı milli ayrı-seçkilik zəminində təzyiqlərin başladığını bildirib.
Kərkicahanda Milli Ayrı-Seçkiliyin Başlanğıcı və Robert Koçaryanın Rolu
Dərgah Haqverdiyev, Ermənistanın keçmiş prezidenti Robert Koçaryanın bu proseslərdə fəal rol oynadığını xüsusilə vurğulayıb. Onun sözlərinə görə, 1988-ci ilin fevral ayından sonra ermənilər azərbaycanlıları aşkar şəkildə qovmağa başlayıb, həmin ilin sentyabrında isə Xankəndi şəhərində yaşayan azərbaycanlıların fərdi evləri yandırılıb. Xankəndi şəhərinin mərkəzi meydanında keçirilən mitinqdən sonra silahlı ermənilər Kərkicahan qəsəbəsinə hücum edərək, bir neçə evi oda veriblər. Koçaryanın təşviqatının bu hadisələrdə mühüm rol oynadığı da qeyd edilib.
Erməni Təcavüzü: Qəsəbənin İşğalı və Əhalinin Köçkün Düşməsi
Zərərçəkmiş Dərgah Haqverdiyev qeyd edib ki, 1991-ci ildən başlayaraq Xankəndi şəhərində yerləşən 366-cı motoatıcı alayda xidmət edən erməniəsilli hərbçilərin iştirakı ilə, həmin alayın silah və texnikasından istifadə edilməklə Kərkicahan qəsəbəsi atəşə tutulub. Həmin ilin dekabrın 28-də isə kəndə hücum edən ermənilər Kərkicahanı işğal ediblər. İşğal zamanı azərbaycanlılara məxsus bütün evlər yandırılıb.
“İşğaldan əvvəl bizə zəng vurub təhqir edir, “çıxın gedin, Qarabağ Ermənistana birləşdirilməlidir, burada ancaq ermənilər yaşamalıdır” deyirdilər. Hücum zamanı isə qışqıraraq “azərbaycanlılar rədd olub getməlidir, bura Ermənistan ərazisidir” söyləyirdilər”, – deyə zərərçəkmiş xatırlayıb. O əlavə edib ki, işğal zamanı əhali çox çətinliklə meşə yolu ilə kənddən çıxaraq Şuşa şəhərinə sığınmaq məcburiyyətində qalıb. İşğala qədər Kərkicahan qəsəbəsində 1796 nəfər əhali yaşayıb. Qəsəbədə 350 fərdi yaşayış evi, orta məktəb binası və digər tikililər azərbaycanlılara məxsus olub.
Müharibə Cinayətləri Üzrə Davam Edən Məhkəmə Prosesi
Hazırda Ermənistan Respublikasının vətəndaşlarının müharibə cinayətləri, sülh və insanlıq əleyhinə cinayətlər, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, terrorçuluq, terrorçuluğu maliyyələşdirmə, hakimiyyəti zorla ələ keçirmə və saxlama kimi çoxsaylı cinayətlər törətməkdə ittiham olunduğu məhkəmə davam etdirilir. Bu prosesdə Ermənistanın keçmiş rəhbəri Robert Koçaryanın adı bir daha Ermənistanın işğal siyasəti ilə əlaqədar hallanır.
