Azərbaycan-Çin əlaqələrinin miqyası genişlənir
Son illərdə Azərbaycan ilə Çin arasında münasibətlər sürətlə inkişaf edir. Ötən ilin iyulunda imzalanan “Azərbaycan ilə Çin arasında strateji tərəfdaşlığın qurulması haqqında Birgə Bəyannamə”, eləcə də cari ilin aprelində Azərbaycan Prezidenti İlham Əliyevin Çinə dövlət səfəri zamanı imzalanmış “iki ölkə arasında hərtərəfli strateji tərəfdaşlığın qurulması haqqında Birgə Bəyanat” və müxtəlif sahələrdə əməkdaşlığa dair sənədlər əlaqələrin miqyasının nə dərəcədə genişləndiyini göstərir. Bu inkişafda dövlət başçılarının şəxsi dostluğu əhəmiyyətli rol oynayır. Çin Xalq Respublikasının Sədri Si Cinpinin Prezident İlham Əliyevi “Çinin dostu” adlandırması və aprel ayındakı səfər zamanı nümayiş etdirilən yüksək səviyyəli qarşılanma deyilənlərin bariz nümunəsidir.
Diplomatik dəstək və parlamentlərarası əməkdaşlıq
Milli Məclis sədrinin müavini Ziyafət Əsgərov iki ölkə arasında münasibətlərin qarşılıqlı hörmət və dostluq prinsiplərinə əsaslandığını vurğulayıb. Onun sözlərinə görə, Azərbaycan və Çin bir çox sahələrdə uğurlu əməkdaşlıq edir, mühüm məsələlərdə daim qarşılıqlı dəstək nümayiş etdirir. Hər iki ölkənin qanunverici orqanları arasında da səmərəli əməkdaşlıq formalaşmışdır və bu əməkdaşlığın inkişafı üçün hər iki tərəf maraqlıdır. Bu cür strateji tərəfdaşlıq əlaqələri bölgədə sabitliyin və inkişafın təminatçısıdır.
İqtisadi əməkdaşlıqda yeni mərhələ
Ziyafət Əsgərov Çin ilə iqtisadi əlaqələrin inkişafının Azərbaycan-Çin münasibətlərində strateji əhəmiyyətə malik olduğunu qeyd edib. Bildirib ki, Çin Azərbaycanın əsas ticarət tərəfdaşlarından biridir. 2024-cü ildə iki ölkə arasında ticarət dövriyyəsi əvvəlki illə müqayisədə 20,7 faiz artaraq 3,744 milyard ABŞ dollarına çatıb. Çinin “Kəmər və Yol” təşəbbüsü çərçivəsində Azərbaycanın mövqeyi olduqca əhəmiyyətlidir. Qazaxıstan-Xəzər dənizi-Azərbaycan-Gürcüstan-Türkiyəni əhatə edən Orta Dəhliz bu təşəbbüsün tərkib hissəsi kimi Çin ilə Avropa arasında yüklərin daşınmasında əhəmiyyətini getdikcə artırır.
Mədəni və humanitar əlaqələr inkişaf edir
Milli Məclis sədrinin müavini həmçinin qeyd edib ki, Azərbaycanda Konfutsi İnstitutları vasitəsilə Çin dilinin öyrədilməsi, Pekin Xarici Dillər Universitetində Azərbaycan dili kafedrasının fəaliyyəti, Bakı-Çendu, Gəncə-Çindao, Naxçıvan-Çonçin və Urumçi, Sumqayıt-Mienyanın qardaşlaşmış şəhər münasibətləri xalqlarımız arasında dostluğun möhkəmlənməsinə mühüm töhfələr verir. Bu cür mübadilələr Azərbaycan-Çin münasibətlərini daha da dərinləşdirir və əlaqələri genişləndirir.
