Müğənni Samirə Əfəndi Azad Vətən Partiyasının sədrini məhkəməyə verir
Tanınmış müğənni Samirə Əfəndi Azad Vətən Partiyasının sədri Akif Nağı barəsində məhkəməyə müraciət edəcəyini açıqlayıb. Sənətçi, “Tarixin bir günü” verilişində etdiyi bəyanatda, onu təhqir edən partiya sədri ilə bağlı hüquqi addımlar atacağını bildirib.
Müsabiqədəki anlar və sosial şəbəkələrdəki rezonans
Müzakirələrə səbəb olan hadisə Qazaxıstanın paytaxtı Astanada keçirilən beynəlxalq müsabiqənin finalında qeydə alınıb. Azərbaycan təmsilçisinin Ermənistan nümayəndəsinə 12 xal verməsi və daha sonra həmin iştirakçının ona yaxınlaşaraq qucaqlaması sosial şəbəkələrdə geniş ictimai müzakirələrə səbəb olmuşdu. Bu anlar ölkə daxilində fərqli reaksiyalar doğurmuşdu.
Hadisədən sonra Azad Vətən Partiyasının sədri Akif Nağı öz sosial media hesabında müğənniyə qarşı kəskin ifadələr işlədib. O, yazıb: “Samirə Əfəndi adında bir q…q Azərbaycan xalqı adından iyrənc hərəkətlərini davam etdirir. İndi də Qazaxıstanda keçirilən mahnı müsabiqəsində erməni gədəsini bağrına basıb ki, dostuq və sair. Bu q…q bir dəfə də olsun Şəhid Anasını, ya da ayağı, əli, gözü yox Qazini bağrına basıbmı? Hakimiyyət buna Azərbaycanı hardasa təmsil etməyə imkan verməsin. Hər bir azərbaycanlı isə onu harda görsə, üzünə tüpürsün! Azərbaycan xalqının heysiyyatı ilə oynamasınlar!” Bu bəyanat hüquqi iddianın əsasını təşkil edir.
