Səbail rayonu Badamdar qəsəbə bələdiyyəsinin sədri Təzəxan Məmmədovun “bəxti gətirən” yoxlama
Səbail rayonunun Badamdar qəsəbə bələdiyyəsinin sədri Təzəxan Məmmədov bu yaxınlarda yaxın çevrəsi üçün böyük bir ziyafət təşkil edib. Bu tədbirin səbəbi Prezident Administrasiyası tərəfindən rayon ərazisində aparılan genişmiqyaslı təftiş prosesinin sədri üçün hər hansı ciddi problem yaratmadan başa çatmasıdır.
Təftiş komissiyası necə aldadıldı?
Məsələ bundadır ki, bələdiyyə sədri hədsiz hiyləgərliyi ilə təftiş komissiyasını aldada bilib. Badamdar ərazisində qanunsuz villalara aparan yolları yoxlama prosesindən əvvəl tamamilə yararsız vəziyyətə salan bələdiyyə sədri, bununla komissiyanın həmin ərazilərə fiziki olaraq daxil olmasının qarşısını alıb. O, komissiyaya bu ərazilərə yol olmadığını və orada heç bir qanunsuz tikilinin mövcud olmadığını bildirib. Yolsuzluq səbəbindən təftiş komissiyası həmin yerlərə baxış keçirə bilməyib. Bu isə Badamdar bələdiyyəsindəki qanunsuzluqların üstünün örtülməsinə səbəb olub.
Dronlardan istifadə edilməməsi Təzəxan Məmmədovu xilas etdi
Təzəxan Məmmədovun bəxti bir də onda gətirib ki, təftiş komissiyasının üzvləri Badamdar ərazisini müşahidə etmək məqsədilə dronlardan istifadə etməyiblər. Halbuki Bakının bir sıra rayonlarında ərazi müşahidələri həm də dronlar vasitəsilə aparılıb. Badamdar bələdiyyəsi ərazisində isə drondan istifadə edilmədiyi üçün sədri çoxsaylı qanun pozuntularını gizlətməyə nail olub. Yoxlamadan qıl payı canını qurtaran Təzəxan Məmmədov bu münasibətlə yaxınlarına ziyafət verərkən, “yaxşı ki, Allah üzümə baxdı, dron baxsaydı, batacaqdım” sözlərini dilə gətirib. Qeyd edək ki, ümumilikdə Azərbaycanda bələdiyyələrin fəaliyyətinə nəzarət vacibdir.
Xatırladaq ki, Təzəxan Məmmədovun əsas himayədarı Səbail Rayon İcra Hakimiyyətinin başçısı Vüqar Zeynalovdur.
Növbəti yazılarımızda sizi Təzəxan Məmmədovla bağlı daha maraqlı faktlarla tanış edəcəyik.
