Bakının Sabunçu rayonunda yaşayan və iş adamı kimi tanınan Cahangir Əliyev Ağaməli oğlu Azərbaycan Respublikasının Prezidenti cənab İlham Əliyevə, Baş prokuror Kamran Əliyevə, Daxili İşlər naziri Vilayət Eyvazova, Ombudsman Səbinə Əliyevaya və digər aidiyyəti dövlət qurumlarına müraciət edərək qarşılaşdığı dələduzluq hadisəsi barədə məlumat verib.
İşbirliyindən Dələduzluğa: Cahangir Əliyevin Tələsi
Müraciətdə bildirilir ki, Cahangir Əliyev öz yük avtomobilləri və digər texnikaları vasitəsilə müxtəlif inşaat layihələrində sifarişlər həyata keçirib. O, 2019-2021-ci illərdə “Sea Breeze” istirahət mərkəzində genişmiqyaslı tikinti işlərində çalışıb. Bu işlər zamanı şəriki Qasım (rəsmi adı Əbdül) vasitəsilə Ruhid Allahverdiyev Rasim oğlu ilə tanış olub. Ruhid Allahverdiyev öz firmasının adından müqavilələr imzalamağı təklif edib və onlar bu əsasda işbirliyinə başlayıblar. Lakin bir müddət sonra Ruhid Allahverdiyev Cahangir Əliyevə çatmalı olan 415.000 manat məbləğində ödənişləri verməkdən imtina edib. O, əvvəlcə “Sea Breeze” rəhbərliyinin pulları gecikdirməsi kimi yalan bəhanələr gətirib. Vəziyyətin bu cür olduğunu görən Cahangir Əliyev 2021-ci ildən etibarən onlarla əməkdaşlığı dayandırıb və borclu olduğu pulları almaq üçün mübarizəyə başlayıb. Lakin Ruhid Allahverdiyev və onunla birlikdə olanlar, özlərini nüfuzlu şəxslərin himayəsində olan adamlar kimi apararaq, “hara istəyirsən şikayət et, biz sənə pul verən deyilik” deyərək hədələyiblər.
Hüquqi Prosesdəki Çətinliklər
Son üç ildir ki, Cahangir Əliyev bütün aidiyyəti orqanlara şikayətlər ünvanlasa da, hələlik konkret nəticə əldə edə bilməyib. Bakı şəhər Sabunçu rayon Polis İdarəsində məsələ araşdırılsa da, cinayət işinin başlanmasından əsassız olaraq imtina edilib. 2025-ci il aprelin 22-də Sabunçu rayon Prokurorluğunda Baş prokuror Kamran Əliyevin qəbulunda olan Cahangir Əliyevin müraciəti Bakı şəhər prokurorluğuna həvalə olunaraq nəzarətə götürülüb. İşin yenidən araşdırılması Bakı Baş Polis İdarəsində müstəntiq Xəlil Əsgərovun icraatına verilib. Müstəntiq bütün istintaq hərəkətlərini yerinə yetirib; Cahangir Əliyevin şəxsi evini kimə satdığı, kimlərdən borc aldığı və kimlərə pul verdiyi barədə məlumatlar toplanıb, dəvət olunanların hamısı faktları təsdiqləyib. Lakin müstəntiq Xəlil Əsgərov iki dəfə işi bağlayaraq cinayət işini aça bilmədiyini, bunun Bakı şəhər Prokurorluğunun öhdəsində olduğunu qeyd edib. Cahangir Əliyev və vəkili Ramil Rüstəmov yenidən Bakı şəhər prokuroru Elşən Abbasovun, eləcə də Baş Prokurorluqda Natiq Abdullayevin qəbulunda olublar. O da ərizənin araşdırılmasını birbaşa Sabunçu RPİ-nin İstintaq Şöbəsinin rəisi Gövdətə tapşırıb.
Ruhid Allahverdiyevin “…hara gedirsən get, hər iki qurumda bu məsələyə yanaşacaq məmur tapa bilməyəcəksən” ifadəsi onun bu qurumlarda havadarının olduğunu bir daha təsdiq edir. Bu günə qədər heç bir hüquq-mühafizə orqanı dələduzluqda ittiham olunan Ruhid Allahverdiyevin əməllərinə hüquqi qiymət verə bilməyib.
Nüfuzdan Sui-istifadə və Müraciət
Müraciətdə qeyd olunur ki, Ruhid Allahverdiyev əvvəllər Dövlət Gömrük Komitəsində aksiz markaları idarəsinin rəisi olmuş general Vəzir Həsənovun yanında işləyib və onun nüfuzundan sui-istifadə edir. Cahangir Əliyev ümumilikdə 415.000 manat pulunun mənimsənildiyini vurğulayır. Bu günə qədər yeddi dəfə araşdırma aparılsa da, hər dəfə əsassız olaraq bağlanıb və Prokurorluq tərəfindən ləğv edilərək yenidən araşdırmaya göndərilib (üçüncü dəfə müstəntiq Xəlil Əsgərovun icraatına verilib).
Cahangir Əliyev Prezidentə müraciətində vurğulayır ki, hüquqi dövlətin əsas məqsədi vəzifəli şəxslərin adından istifadə edərək cəmiyyətdə dələduzluq edən şəxslərə qarşı mübarizə aparmaqdır. O, bu cür şəxslərin və onları himayə edən hüquq-mühafizə orqanlarının məsuliyyətə cəlb edilməsinin vacibliyini bildirir. Bu hal, Ali Baş Komandanın “Dəmir Yumruq” siyasətinin təkcə xarici düşmənlərə qarşı deyil, daxili korrupsiyalaşmış dəstələrə qarşı da tətbiq oluna biləcəyini göstərər.
Cahangir Əliyev Prezidentdən xahiş edir ki, hazırda Bakı Baş Polis İdarəsinin İstintaq Şöbəsinin icraatında olan iş üzrə ədalətli yanaşılaraq tədbir görülməsi üçün Daxili İşlər naziri cənab Vilayət Eyvazova və Baş prokuror cənab Kamran Əliyevə göstəriş verilsin. Azərbaycan Respublikasının prokurorluq orqanlarının fəaliyyəti haqqında ətraflı məlumatı Azərbaycan Respublikasının Prokurorluğu səhifəsindən əldə etmək mümkündür.
