Prezidentin Qətiyyətli Mesajına Baxmayaraq: Gömrükdə Vəzifədən Sui-İstifadə İddiaları
Azərbaycan Prezidenti İlham Əliyev yanvarın 12-də yerli televiziya kanallarına müsahibəsində korrupsiya və rüşvətxorluqla mübarizədə göstərilən qətiyyəti və sözlə əməl arasındakı vəhdəti xüsusi vurğulamışdı. Dövlət başçısı məmurlara dəfələrlə xəbərdarlıq edərək, bu çirkaba bulaşan şəxslərin çox sərt şəkildə cəzalandırılacağını bildirmiş, ən yüksək vəzifəli şəxslərin belə istintaq və məhkəmə qarşısında cavab verdiyini qeyd etmişdi. Prezident həmçinin heç kimin qanundan üstün olmadığını, qanun qarşısında hamının bərabər olduğunu və heç kimin əvvəlki xidmətlərinin nəzərə alınmayacağını vurğulayaraq, bu əyri yola gedənlərin xidmətlərini “ayı xidməti”nə bənzətmişdi. Lakin görünür ki, bu qətiyyətli mesajlar bəzi dövlət qurumlarında, xüsusən də gömrük orqanlarında hələ də öz təsirini tam göstərməyib.
Bakı Baş Gömrük İdarəsində Yaradılan Problemlər
Dövlət başçısının sərt xəbərdarlıqlarına rəğmən, Azərbaycanın gündəmində bir iş adamına qarşı qərəzli yanaşma və onun müflis edilməsinə yönəlik addımlar ölkə mətbuatında geniş müzakirə olunur. Bakı Baş Gömrük İdarəsinə qısa zaman əvvəl rəis təyin edilmiş Elmir Ramazanov bu tövsiyələrdən nəticə çıxarmayanlar sırasına adını yazdırmağı bacarıb. Qeyd edək ki, Elmir Ramazanov müavin vəzifəsində işləyərkən də “LİON CENTRE” MMC-nin rəhbəri Ramil Aslanov tərəfindən şikayət obyekti olmuşdu. Hazırkı hadisələr isə keçmişdən qalan qisas duyğusunun təzahürü kimi qiymətləndirilir. Ramil Aslanovun bildirdiyinə görə, Elmir Ramazanovun rəis təyin olunduqdan sonra verdiyi qərarlar və atdığı addımlar onun üçün qara günlərin başlanğıcı olub. Sahibkarın aylardır dövlət qurumlarına müraciət etməsinə və bu müraciətlərə əsaslanaraq Elmir Ramazanova dəfələrlə xəbərdarlıq edilməsinə baxmayaraq, vəzifədən sui-istifadə hallarına yol verilməsi müşahidə edilir.
Gömrükdə Girov Saxlanılan Mallar və İtirilən Milyonlar
“LİON CENTRE” MMC-nin adına Çin Xalq Respublikasından gətirilən mallar, xüsusən də 31.07.2024 tarixli 01241000304074 saylı, 29.07.2024 tarixli 01241000300384 saylı və 18.05.2024 tarixli 01241000193408 saylı gömrük bəyannamələri üzrə Bakı Baş Gömrük İdarəsinə daxil olan yüklərlə bağlı ciddi problemlər yaranıb. Sahibkarın sözlərinə görə, mallar təxminən 17 gün ərzində İpək Yolu Terminalında “girov” saxlanılıb. Bu vəziyyət, ona böyük miqdarda maddi ziyan vurmaqla yanaşı, xarici tərəfdaşlar qarşısında işgüzar nüfuzuna da xələl gətirib. Hətta 14.08.2024 tarixində iki bəyannamə üzrə (01241000304074 və 01241000300384) mallar terminaldan buraxılsa da, qeyri-müəyyən səbəblərdən gömrük rəsmiləşdirilməsi hələ də tamamlanmayıb. Malların 16 saat ərzində yoxlanılması və sənədlərlə tam uyğunluq təşkil etməsi aşkarlandıqdan sonra, Ramil Aslanov gömrükdə vəzifədən sui-istifadə hallarının daha da ifşa olunduğunu düşünür. Əgər mallarda heç bir qanuni problem yox idisə, onların hansı səbəbdən girov saxlanıldığı və niyə bu qədər ziyan vurulduğu sual doğurur.
Sahibkarın Ödənişlərə Baxmayaraq Həll Olunmayan Məsələsi
Ramil Aslanovun Prezidentə ünvanladığı müraciətdə bildirilir ki, 01241000193408 saylı bəyannamə ilə bağlı yaranmış problemlə əlaqədar olaraq 08.08.2024 tarixində 200 manat gömrük yığımı, 22617.65 manat idxal rüsumu və 31777.02 manat ƏDV ödənişləri edilib. Sahibkarın sözlərinə görə, 07.08.2024 tarixində Dövlət Gömrük Komitəsində keçirilən görüşdə ödənişlərin edilib malların götürülməsi qərara alınsa da, Elmir Ramazanov tərəfindən verilən vədlər yerinə yetirilməyib. Sahibkar qeyd edir ki, vəziyyəti həll olunmuş kimi göstərmək üçün sənədlər tərtib edilsə də, ona verilən heç bir sözə əməl edilməyib. Nəticədə, Ramil Aslanov 09.08.2024 tarixində L-23/24 saylı məktubla Bakı Baş Gömrük İdarəsinin rəisi Elmir Ramazanova müraciət edərək ödənilən vəsaitlərin (ümumi 54594.67 AZN) yeni idxal etdiyi malların rüsumunun ödənilməsi üçün gömrükdəki hesabına qaytarılmasını tələb edib. Eyni zamanda, o, məhkəmə predmeti olan məsələ ilə bağlı Dövlət Gömrük Komitəsinin 17.07.2024 tarixli 3-33/2-009916/2024 saylı etiraz məktubu üzrə “elektrik dəyişdirici açarlar və cərəyan birləşdirici yuvalar” mövzusunu məhkəmə və digər dövlət qurumlarına daşıyacağını bildirib. Bütün bunlara baxmayaraq, bu günədək ödənilən pul vəsaiti “LİON CENTRE” MMC-nin depozit hesabına qaytarılmayıb. Sahibkar bu addımların onun fəaliyyətinə zərər vurmaq və normal sahibkarlıq işini pozmaq məqsədi daşıdığını hesab edir.
Sahibkarın Prezidentə Təkrar Çağırışı
Ramil Aslanov, dövlət başçısına ünvanladığı son müraciətində özünü Prezidentin sadiq xidmətçisi adlandıraraq, onun apardığı daxili və xarici siyasəti daima dəstəklədiyini və korrupsiya, rüşvətxorluq, məmur özbaşınalığına qarşı mübarizə tezislərinin reallaşması üçün çalışdığını bildirir. O, bu mübarizəsini Prezidentə arxalanaraq davam etdirəcəyini vurğulayır. Sahibkar yenidən Prezidentdən xahiş edir ki, 01241000193408 saylı bəyannamə üzrə ödənilən 54594.67 manat vəsaitin depozit hesabına geri qaytarılması və şirkətinə qarşı yönəlmiş qanunsuz hərəkətlərin yerinə yetirilməsi, habelə qanunun tələblərini pozan dövlət məmurlarına qarşı ölçü götürülməsi ilə bağlı müvafiq dövlət qurumlarının rəhbərlərinə tapşırıq verilsin və məsələ xüsusi nəzarətdə saxlanılsın. O, ölkə iqtisadiyyatının inkişafına və əhalinin sosial rifahının yüksəlməsinə inamını ifadə edir.
