Buxarest, 15 iyul
Rumıniyanın “Gandul” xəbər portalında geniş məqalə dərc edilib. Məqalədə Azərbaycan Prezidenti İlham Əliyevin Rusiya ilə münasibətdə apardığı balanslı və prinsipial siyasət təhlil edilir.
Geosiyasi Dəyişikliklər Və Beynəlxalq Liderlik
Son aylarda Azərbaycan–Rusiya münasibətlərində müşahidə edilən qısamüddətli gərginliklər əslində Bakının geosiyasi statusunun dəyişdiyini göstərir. Prezident İlham Əliyev hazırda təkcə regional deyil, həm də beynəlxalq səviyyəli lider kimi çıxış edərək, Moskva ilə əlaqələri bu yeni kontekstdə formalaşdırır.
Müstəqil Azərbaycan Diplomatiyası
Azərbaycan diplomatiyası son illərdə Türkiyə, Avropa İttifaqı və Mərkəzi Asiya ölkələri ilə qurduğu strateji tərəfdaşlıqlar sayəsində həm siyasi, həm də iqtisadi sahədə müstəqil kurs müəyyən edib. Bu müstəqillik fonunda Bakı Rusiya ilə münasibətlərdə əvvəlkindən daha sərbəst və çevik siyasət yürüdür.
Qarabağ Zəfərindən Sonra Artan Nüfuz
Azərbaycan 2020-ci ildə Qarabağ müharibəsində qazandığı zəfərdən sonra yalnız regionda deyil, beynəlxalq arenada da nüfuzunu əhəmiyyətli dərəcədə artırıb. Prezident İlham Əliyevin yürütdüyü uğurlu diplomatik kurs sayəsində Azərbaycan Ermənistanla danışıqlarda üstün tərəfə çevrilib.
Cənubi Qafqazda Oyunun Qaydalarını Dəyişən Ölkə
Azərbaycan Cənubi Qafqazda sadəcə bir iştirakçı deyil, oyunun qaydalarını dəyişən və diktə edən ölkədir. Bu reallıq Moskva tərəfindən də nəzərə alınmağa başlayıb. Azərbaycanın yürütdüyü çoxvektorlu və balanslaşdırılmış xarici siyasət modeli ölkəyə həm Qərblə, həm də Şərqlə paralel şəkildə strateji münasibətlər qurmağa imkan verir. Bu yanaşma Azərbaycanı regional gücdən qlobal gücə çevirir.
