Vəzifəli Şəxslərin Övladları: İctimaiyyətin Gündəmindən Düşməyən Davranışlar
Azərbaycanda yüksək vəzifəli şəxslərin və deputatların övladlarının davranışları, yaşam tərzi mütəmadi olaraq ictimaiyyətin müzakirə obyektinə çevrilir. Son olaraq deputat Günay Ağamalının qızı olduğu iddia edilən bir şəxsin boynunda xaç asaraq rəqs etdiyi görüntülərin yayılması oxşar hadisələri yenidən gündəmə gətirib. Günay Ağamalı həmin şəxsin onun övladı olmadığını bildirsə də, məmur övladlarının nümayişkaranə həyat tərzi ilə bağlı nümunələr ölkədə kifayət qədərdir. Atalar demişkən, “Fərsiz övlad əldə altıncı barmaq kimidir, kəsərsən ağrıyar, saxlarsan eybəcər göstərər”.
Övladları səbəbilə gündəmə gələn sabiq məmurlar
Bakının keçmiş meri və sabiq Baş nazirin müavini Hacıbala Abutalıbovun ailəsində də oxşar hadisə yaşanıb. Onun oğlu İsrafil Abutalıbovun bir zamanlar radikal dini qruplardan biri ilə yaxınlaşdığı və həyat tərzini buna uyğun qurduğu iddia edilirdi. Yazılanlara görə, dəbdəbəli həyatdan əl çəkən İsrafil Abutalıbov evdə valideynləri ilə mübahisələr edir, onları başa düşmələrini istəyirdi. Sonradan onun əvvəlki radikal dini baxışlardan uzaqlaşaraq yenidən atasının biznesinin idarə olunmasında fəal iştirak etməyə başladığı deyilirdi. Hacıbala Abutalıbovun oğlu ilə bağlı yayılan məlumatlarda onun sələfi cərəyanına maraq göstərdiyi iddia edilirdi.
Baş nazirin digər sabiq müavini Əli Həsənov da nəvəsi ilə bağlı mətbuatın gündəmində olmuşdu. Əli Həsənovun nəvəsi Nail Allahverdiyev 2017-ci il avqustun 3-də idarə etdiyi “Gelandewagen” markalı avtomobillə iki nəfərin ölümü, iki nəfərin isə xəsarət alması ilə nəticələnən qəza törətmişdi. Hadisədən sonra nəvə həbs olunmuş, baba isə Qaçqınların və Məcburi Köçkünlərin işləri üzrə Dövlət Komitəsinin sədri vəzifəsini itirmişdi. Bu hadisə məmur övladlarının cəzasızlıq sindromu ilə bağlı ictimai narahatlığı daha da artırmışdı.
Yaxın günlərdə övladı ilə bağlı müzakirələrə səbəb olan digər rəsmi isə Elman Nəsirovdur. Deputatın ilk nikahından olan övladı sosial şəbəkədə video yayaraq atasını ona yardım göstərməməkdə ittiham edib. Parlamentarinin qızının sözlərinə görə, dörd yaşı olanda valideynləri ayrılıb və o, anası ilə birgə yaşayıb. 26 yaşlı xanım E.Nəsirovun indiyədək onunla maraqlanmadığını, hətta toyunda da iştirak etmədiyini bildirib. Millət vəkili isə cavabında ilk nikahdan olan qızına ata-babadan üç-dörd ev qaldığını söyləyib.
Prezident Administrasiyasının sabiq rəhbəri, “boz kardinal” Ramiz Mehdiyev isə 2020-ci ildə ölkədə koronavirusa görə karantin rejimi tətbiq olunduğu halda, Novxanıda bağ evində qız nəvəsinə dəbdəbəli toy etdiyi üçün ciddi müzakirələrə səbəb olmuşdu. Nəticədə həmin ildəki sanitar-epidemioloji qaydalara əməl etməyən məmur övladları və qonaqlar belə cərimələnmişdi. Bu hadisə ictimaiyyətdə xüsusi rezonans doğurmuşdu və Ramiz Mehdiyevin nüfuzuna ciddi zərbə vurmuşdu.
Vəzifəsini övladına görə itirənlər
Övladına görə vəzifəsini itirən məmurlardan biri də sabiq əmək və əhalinin sosial müdafiəsi naziri Füzuli Ələkbərovdur. Onun oğlu Vüqar 2013-cü ildə “Hammer” markalı maşınla qəza törədib, hadisə yerinə toplaşan insanların ünvanına təhqiramiz ifadələr işlətmişdi. Bundan sonra eks-nazirin oğluna məxsus “Çıraq” hoteli və onun bir neçə bahalı avtomobili yandırılmışdı. Hadisədən 10 ay sonra Füzuli Ələkbərov nazir vəzifəsi ilə vidalaşmışdı. İsmayıllının ovaxtkı icra başçısı Nizami Ələkbərov (Füzuli Ələkbərovun qardaşı) da vəzifəsindən azad edilmişdi.
Sabiq müdafiə sənayesi naziri, hazırda Azərbaycan Təhlükəsizlik Şurası katibinin müavini olan general-polkovnik Mədət Quliyev də oğlu ilə sınaqdan keçən məmurlardandır. Onun oğlu Murad Qulubəyli tez-tez qlamur həyat tərzi ilə müzakirə yaradır. Belə ki, M.Qulubəylinin sosial şəbəkələrdə paylaşdığı fotolar ictimaiyyət tərəfindən birmənalı qarşılanmır və məmur övladlarının dəbdəbəli həyatına dair suallar doğurur.
Keçmiş nəqliyyat naziri Ziya Məmmədov isə “ayıyeyən” oğlu Anarla gündəmə gəlmişdi. Hadisə 2010-cu ildə baş verib. Məmur oğlu dostları ilə Qəbələdəki restoranların birində qəfəsdə saxlanılan ayını kəsdirərək kabab edib yemişdilər. Həmin dönəmdə bu hadisə geniş rezonans doğurmuşdu.
İqtisadiyyat nazirinin müavini, SOCAR-ın sabiq prezidenti Rövnəq Abdullayev də oğluna görə müzakirə olunan məmurlardandır. 2019-cu ildə nazir müavinin oğlu Rəşad Abdullayevin İbiza adasında 1.3 milyon dollarlıq “Richard Mille 50-03 McLaren F1” markalı saatının oğurlanması xəbəri gündəm yaratmışdı.
Səfərbərlik və Hərbi Xidmətə Çağırış üzrə Dövlət Xidməti rəisinin sabiq müavini, general-mayor Novruzəli Orucov da oğlu sarıdan qınanan məmurlardandır. Övladı Rüstəm sürətli idarəetməyə görə ona irad bildirən avtobus sürücüsünü təqib edərək döymüşdü. Sürücünün şikayətindən sonra haqqında cinayət işi açılan məmur oğlu həbsə getmiş, atası isə işdən çıxarılmışdı.
Övladına görə vəzifəsindən olanlardan biri də Bakı Dövlət Universitetinin sabiq rektoru Abel Məhərrəmovdur. Eks-rektor 2018-ci ildə səfir oğlu Anar Məhərrəmovun İspaniyada şərab biznesinə görə vəzifəsindən azad edilib. Anar Məhərrəmov özü isə 2021-ci ildə səfir kimi geri çağırılıb. Məlumata görə, ovaxtkı rektorun oğlu Azərbaycandan İspaniyaya uçan təyyarədə şərab dolu çəlləklər aparılıb və orada şüşələrə doldurularaq qeyri-qanuni şəkildə geri qaytarılıb. Sonra isə ispan şərabı adı ilə A.Məhərrəmova məxsus şadlıq evlərində, restoranlarda və digər ticarət nöqtələrində satılıb.
Bakı Lift-Təmir İstehsalat Birliyinin sabiq rəisi Qüdrət Şükürovun vəzifədən azad edilməsi də övladı ilə bağlı olub. Onun 2017-ci ildə ikinci dəfə ailə həyatı quran qızı Ayselə 400 min dollarlıq toy etməsi ciddi rezonans yaratmışdı. Bloqer kimi fəaliyyət göstərən Aysel Şükürova bu hadisə haqqında sual ünvanlayan jurnalistə söyüşlə cavab vermişdi. Bu hadisə də məmur övladlarının imtiyazlı mövqeyi və ictimaiyyətə qarşı münasibəti ilə bağlı narahatlıqları artırmışdı.
Xüsusi Dövlət Mühafizə Xidmətinin sabiq rəisi, general-polkovnik Vaqif Axundov 2014-cü ildə “ziyafətlər kralı” kimi tanınan oğlu Murada görə gündəmə gəlib. Murad Axundovun sosial şəbəkələrdəki paylaşımları, öz ətrafı ilə Lacivərd sahillərdə, Marbelyuda, Dubayda əylənməsi, klubda “Crystal” şampanına bir neçə min dollar ödəməsi ictimaiyyətdə böyük müzakirə yaratmışdı. Bu cür hadisələr Ramiz Mehdiyevin nəvəsinin toyu kimi, məmurların övladlarının həddən artıq dəbdəbəli həyat tərzi ilə bağlı ciddi suallar ortaya çıxarır.
Qəzalar, zorakılıq və deputat mandatı
Nəsimi rayon İcra Hakimiyyətinin sabiq başçısı, hazırda millət vəkili olan Asif Əsgərovun oğlu İlham Əsgərli də ağır avtoqəza törədib. 2014-cü ildə baş verən qəzada “McDonalds Azərbaycan”ın rəhbəri Maqsud Mirzəyevin avtomobildə olan oğlu Sənan Mirzəyev həyatını itirib. Hadisəyə görə İlham Əsgərli həbs olunsa da, onun məhbus həyatı uzun sürməyib. İ.Əsgərli 2015-ci ilin mayında məhkəmə zalında həbs edilmiş, ona 5 il 6 ay həbs cəzası verilmişdi. Ancaq qısa müddətdən sonra İlham Əsgərli səhhəti ilə bağlı azadlığa çıxmışdı. Bu cür halların yaranması Əli Həsənovun nəvəsinin məhkəmə işi zamanı da müşahidə olunmuşdu.
Azərbaycanın dövlət və siyasi xadimi Afiyəddin Cəlilovun adını daşıyan yeniyetmə nəvəsinin çəkdiyi videolar da cəmiyyəti narahat edib. Nəvə Afiyəddinin 2024-cü ildə paytaxtın mərkəzində yaşlı qadını qucağına alması gündəm yaradan hadisələrdən olub.
IV çağırış Milli Məclisin deputatı Ayaz Orucov isə oğlunun özbaşınalığına görə mandatından olub. Oğlu İsmayıl Orucov Binəqədi rayonu, Azadlıq prospektində ağ rəngli “Gelandewagen”dən “Nissan Juke” markalı maşına səkkiz dəfə atəş açmışdı. Bu hadisədən sonra Ayaz Orucovun deputatlıq fəaliyyəti sonlandırmışdı.
Sabirabadın sabiq başçısı Nazim İsmayılovun da kiçik oğlu törətdiyi qəza ilə diqqət mərkəzinə düşüb. 2014-cü ildə atasının “Prado” markalı xidməti avtomobilini idarə edən oğul İsmayılov birdən-birə iki “VAZ 06” markalı “Jiquli”ni əzib. Maşınlardan biri yararsız hala düşüb.
Eks-deputat İqbal Məmmədov da oğlu ilə gündəmə gələn məmurlardan olub. 2019-cu ildə Lerikdə İqbal Məmmədova məxsus “Relax” istirahət mərkəzinə gələn polis və vergi işçilərini sabiq deputatın oğlu Mirhəmid və onun qohumları döyüblər. Həmin şəxslər bu hadisədən sonra həbs olunsa da, bir neçə ay sonra azadlığa çıxıblar. Ümumilikdə, məmur övladları ilə bağlı bu cür hadisələr cəmiyyətdə etimadsızlığı artırır və qanun qarşısında bərabərlik prinsipinə dair suallar yaradır.
