Pekin, 26 iyun.
Çin Xalq Respublikasına rəsmi səfəri çərçivəsində Azərbaycan nümayəndə heyəti iyunun 26-da Pekində Çin Media Qrupunu və Çin Kommunikasiya Universitetini ziyarət edib.
Çin Media Qrupunda geniş müzakirələr
Çin Media Qrupunda baş tutan görüş zamanı informasiya siyasəti, rəqəmsal transformasiya, çoxdilli yayım imkanları və müasir texnoloji yanaşmalar barədə geniş fikir mübadiləsi aparılıb. Tərəflər, beynəlxalq media əməkdaşlığının inkişaf etdirilməsi, məzmun mübadiləsinin genişləndirilməsi və texnoloji innovasiyaların öyrənilməsi sahəsində gələcək addımları müzakirə ediblər.
Çin Kommunikasiya Universitetində təhsil perspektivləri
Nümayəndə heyətinin Çin Kommunikasiya Universitetinin rəhbərliyi ilə görüşündə media təhsili sahəsində əməkdaşlıq perspektivləri, peşəkar kadr hazırlığı, təcrübə mübadiləsi və birgə akademik təşəbbüslərin reallaşdırılması məsələləri diqqət mərkəzində olub. Həmçinin, gələcəkdə ortaq layihələrin və platformaların yaradılması imkanları da araşdırılıb.
Nümayəndə heyətinin tərkibi
Səfərdə Azərbaycandan olan nümayəndə heyətinə Azərbaycan Respublikasının Medianın İnkişafı Agentliyinin İcraçı direktoru Əhməd İsmayılov, Azərbaycan Respublikası Audiovizual Şurasının sədri İsmət Səttarov, Azərbaycan Respublikası Prezidentinin Administrasiyasının Qeyri-hökumət təşkilatları ilə iş və kommunikasiya şöbəsinin Media ilə iş sektorunun müdiri Kamran Həsənov, Azərbaycan Dövlət İnformasiya Agentliyinin İdarə Heyətinin sədri Vüqar Əliyev və “AnewZ” telekanalının İcraçı direktoru Rüfət Həmzəyev daxildir.
