Ağır İstehsalat Qəzası: Ramil Əliquliyevin Dramı
Bakı şəhər sakini Ramil Boris oğlu Əliquliyev Hurriyyet.az saytının redaksiyasına göndərdiyi müraciətdə ölkə rəhbərliyinə – Prezident İlham Əliyevə, Ali Məhkəmənin sədri İnam Kərimova və Baş Prokuror Kamran Əliyevə iş yerində yaşadığı ağır qəza və sonrakı məhkəmə-istintaq prosesi ilə bağlı şikayətini çatdırıb. Əliquliyev Ramilin sözlərinə görə, o, 26 noyabr 2024-cü il tarixində, saat 16:30 radələrində Zəngilan rayonunun Cahangirbəyli kəndi ərazisində beton istehsalı üçün nəzərdə tutulmuş texnikadan istifadə edərkən dəhşətli xəsarət alıb. Bu hadisə nəticəsində sol qolunu dibindən itirən Ramil Əliquliyev, həmçinin sol III, IV və VI qabırğaların yerdəyişmiş sınıqları, sol tərəfli hemopnevmotoraks (sol döş boşluğuna qanın və havanın toplanması) və dərialtı emfizema ilə müşayiət olunan döş qəfəsinin sol yarısının qapalı küt travması kimi ağır zədələr alıb. Hadisədən dərhal sonra Dövlət Təhlükəsizlik Xidmətinin Hospitalına yerləşdirilən zərərçəkən orada əməliyyat olunub və bir neçə gün müalicə alıb.
İstintaq Prosesindəki Müəmmalar və Zəngilan Prokurorluğu
Əliquliyev Ramilin müraciətinə əsasən, bədbəxt hadisədən sonra, 29 dekabr 2024-cü il tarixində Zəngilan Prokurorluğunda Azərbaycan Respublikası Cinayət Məcəlləsinin 162-ci maddəsi ilə cinayət işi başlanılıb. İşin istintaqı rayon prokurorunun böyük köməkçisi vəzifəsini icra edən, II dərəcəli hüquqşünas Teyyub Rəfiyevə həvalə edilib. Lakin zərərçəkən istintaqın birtərəfli aparıldığını iddia edir. Onun fikrincə, istintaq yalnız Nizami adlı bir şəxsi məsuliyyətə cəlb edib, halbuki hadisə zamanı istifadə olunan beton istehsalı texnikasının işlək və ya dayanıq vəziyyətdə olmasından asılı olmayaraq, onun qoruyucu hissəsinin olmaması faktı diqqətdən kənarda qalıb. Ramil Əliquliyev, iş materiallarında bu qüsurun aşkar göründüyünü, lakin istintaqın bu məsələni dərindən araşdırmadığını qeyd edir. O, həmçinin, həmin texnikanın Zəngilan rayonunun Cahangirbəyli kəndinə kimin razılığı ilə yerləşdirildiyi və ondan fəhlə-operatorun istifadə edə bilib-bilmədiyi kimi vacib suallara cavab tapılmadığını vurğulayır.
Məhkəmənin Qərarı və “Hünər İnşaat” Şirkətinə Yönələn Tənqidlər
Cinayət işi aidiyyəti üzrə Zəngilan rayon Məhkəməsində hakim Gülsarə İmanovanın icraatına daxil olub. İş üzrə ittiham tərəfini prokuror Tural Hüseyn oğlu Nəbiyev təmsil edib. Ramil Əliquliyev ittiham tərəfinin onun ərizə və müraciətlərini qəbul etmədiyini, formal olaraq şirkətin xeyrinə fikirlər səsləndirdiyini və müraciətlərinin təmin olunmamasını xahiş etdiyini bildirir. Məhkəmə də öz növbəsində zərərçəkənin mülki iddiasına baxmayıb, həmçinin “Hünər İnşaat” Firmasının vəzifəli şəxsləri – Fərhad Təhməzovun qohumları Xurşud və Yunis, eləcə də şirkətin digər rəsmiləri ilə bağlı heç bir tədbir görməyib. Nəticədə, hadisə zamanı məzuniyyətdə olduğu iddia edilən Nizami adlı şəxsə 3000 (üç min) manat cərimə cəzası kəsilməklə işin yekunlaşdırıldığı qeyd olunur.
Əliquliyev Ramil istehsalatda baş vermiş bədbəxt hadisə haqqında №01/2025 saylı akta istinad edərək, əmək qanunvericiliyinin pozuntusuna yol vermiş şəxslərdən birinin direktor Yunis Nəbiyev olduğunu bildirir. Aktda əməyin təhlükəsizliyinə dair keçirilən təlimatın tarixi, giriş təlimatı, ilkin (təkrar) təlimat və biliyin yoxlanılması qeydlərinin olmaması da vurğulanır. Hətta şirkətin əməkdaşı Ruhin Nəcəfi adlı şəxsin ona köhnə tarixlərə təhlükəsizlik jurnalına qol çəkdirmək istəməsi, lakin Ramil Əliquliyevin imza etməkdən imtina etməsi də iddia olunur. O, alqı-satqı müqaviləsinə əsasən, həmin texnikaya cavabdehliyin pul ödənildikdən sonra “Hünər İnşaat” Firmasının öhdəsinə düşdüyünü qeyd edərək, yalnız Nizami adlı şəxsin məsuliyyətə cəlb edilməsi ilə qətiyyən razı olmadığını bildirir.
Əlavə olaraq, zərərçəkən Ramil Əliquliyev iddia edir ki, “Hünər İnşaat” şirkətinin direktoru Yunis Nəbiyev, operator Vüsal Bədəlov və digər vəzifəli şəxslərin icazəsi olmadan beton istehsalı üçün nəzərdə tutulmuş texnikanın əraziyə yerləşdirilməsi mümkün deyildi. Bu gün belə həmin texnika sözügedən ərazidə işləməyə davam edir. Bütün bu haqsızlıqlara baxmayaraq, zərərçəkənlə heç kim maraqlanmır, ona heç bir maddi və mənəvi dəstək göstərilmir. Ramil Əliquliyev cinayət işinin də düzgün araşdırılmadığını qeyd edərək, özünü öldürmək həddinə çatdığını vurğulayır. O, əmək qanunvericiliyi ilə bağlı müraciətində Azərbaycan Respublikasının Əmək Məcəlləsi kimi vacib sənədlərin göz ardı edildiyini düşünür.
Ədalət Tələbi və Dəstək Çağırışı
Bütün bunları nəzərə alaraq, Ramil Əliquliyev yüksək vəzifəli şəxslərdən – Prezident İlham Əliyevdən, Ali Məhkəmənin sədri İnam Kərimovdan və Baş Prokuror Kamran Əliyevdən xahiş edir ki, Zəngilan Prokurorluğunun böyük köməkçisi Teyyub Rəfiyevin, Zəngilan rayon Məhkəməsində cinayət işi üzrə ittiham tərəfindən çıxış edən prokuror Tural Hüseyn oğlu Nəbiyevin, Zəngilan rayon Məhkəməsinin hakimi Gülsarə İmanovanın, eləcə də “Hünər İnşaat” Firmasının vəzifəli şəxsləri – Fərhad Təhməzovun qohumları Xurşud və Yunisin, şirkətin operator vəzifəsində çalışan əməkdaşı Vüsal Bədəlovun, həmçinin ona köhnə tarixlə təhlükəsizliklə bağlı təlimat jurnalına qol çəkdirmək istəyən əməkdaş Ruhin Nəcəfinin və şirkətin digər vəzifəli şəxslərinin əməllərinə hüquqi qiymət verilməsinə göstəriş versinlər. O, bütün dediklərinə dair şahidlərinin olduğunu və məzuniyyətdə olan şəxsə 3000 manat cərimə yazılmasını böyük bir haqsızlıq hesab etdiyini bir daha qeyd edir. Əliquliyev Ramil işdəki laqeydliyin araşdırılmasını tələb edir və ədalətə nail olacağına ümid edir.
