Nizami Alışan barəsindəki dələduzluq işi üzrə növbəti məhkəmə
İnvestisiya platformasında valyuta alqı-satqısı fəaliyyəti ilə gəlir əldə etmək istəyən üç nəfərin külli miqdarda pulunu dələduzluq yolu ilə ələ keçirməkdə təqsirləndirilən Nizami Alışanın cinayət işi üzrə Bakı Ağır Cinayətlər Məhkəməsində növbəti proses keçirilib. Hakim Aytən Əliyevanın sədrliyi ilə baş tutan məhkəmə iclasında ibtidai istintaq və məhkəmə protokollarına əlavə edilmiş sənədlərin araşdırılması zamanı təqsirləndirilənin həyat yoldaşı Günel Alışanın ifadəsinə zərurət yaranıb və onun iştirakı təmin edilib.
Şahid ifadələri və ittiham detalları
Günel Alışan ifadəsi zamanı vəkilin suallarını cavablandırıb. O, həyat yoldaşının saxlanılması ilə bağlı qeyd edib ki, Nizami Alışan işdə olarkən tutulub. Həyat yoldaşının saxlanıldığını əvvəlcə bilməyən Günel Alışan, iki gün sonra onun Baş Mütəşəkkil Cinayətkarlıqla Mübarizə İdarəsində (BMCMİ) olduğunu öyrəndikdən sonra lazımi orqanlara məktubla müraciət edib. Lakin prokurorun Nizami Alışanın məşğuliyyəti ilə bağlı verdiyi sualı cavabsız qoyub.
Digər şahid Rövşən Dadaşov isə ifadəsində hazırda başqa cinayət işi ilə bağlı cəza çəkdiyini bildirib. O, 2022-ci ilədək “İnvestAz” şirkətində məsləhətçi kimi çalışıb və Nizami Alışanla sıx əlaqələri olduğunu deyib. Dadaşov qeyd edib ki, o, Nizami Alışana birja təhlili sahəsində təlimlər keçib və onun bu sahədə çox yüksək bacarığa malik bir şəxs olduğunu vurğulayıb. Şahidin sözlərinə görə, Nizaminin hesabından aylıq çıxarışlar 50-100 min dollar civarında olub, 2017-ci ildən 2022-ci ilədək isə ümumi məbləğ təxminən 5 milyon dollar təşkil edib. Məhkəmə materiallarına görə, ittihamda Nizami Alışan özünü səhm və valyuta alqı-satqısı üzrə mütəxəssis kimi təqdim edərək Babək Məmmədzadədən 1 milyon 300 min, Zeynal Usubovdan 945 min, Yadigar İsrafilovdan isə 200 min dollar pulu mənimsəyib.
Dəymiş ziyan və ailə bağları
Zərərçəkmişlərə dəymiş ümumi zərər 2 milyon 445 min dollar (4 milyon 156 min 500 AZN) təşkil edir. Nizami Alışana qarşı Cinayət Məcəlləsinin 178.4-cü (dələduzluq – xüsusilə külli miqdarda ziyan vurmaqla törədildikdə) maddəsi ilə ittiham irəli sürülüb. İş üzrə Zeynal Mütəllim oğlu Usubov, Babək Məhəmməd oğlu Məmmədzadə və Yadigar Şibi oğlu İsrafilov zərərçəkən qismində tanınıblar. Qeyd edək ki, Nizami Alışan AzTV-nin keçmiş sədri Arif Alışanovun qardaşı oğlu, hazırda ABŞ-də yaşayan müğənni Elariz Məmmədoğlunun kürəkənidir.
