Yeni Günəşlidə Gecə Tikintisi Sakinlərin Yuxusunu Ərşə Çəkir
Suraxanı rayonunun Yeni Günəşli qəsəbəsində yerləşən “V” yaşayış sahəsində qeyri-iş saatlarında, yəni gecə tikintisinin davam etdirilməsi ciddi narazılığa səbəb olub. Sakinlərin sözlərinə görə, işlər axşam 20:00-dan səhər 06:00-dək davam edir, bu da ətraf binalarda yaşayanlar üçün dözülməz vəziyyət yaradır. Gecə boyu davam edən səs-küy onların yuxusunu ərşə çəkir, dincəlməyə imkan vermir.
Rəsmi Müraciətlər Cavabsız Qalır
Narazı Yeni Günəşli sakinləri mövcud problemlə bağlı dəfələrlə müvafiq rəsmi qurumlara müraciət etsələr də, iddialarına görə, heç bir cavab ala bilməyiblər. Vətəndaşlar bu vəziyyətdə korrupsiya şübhələrinin olduğunu və məsul şəxslərin məsələyə göz yumduğunu irəli sürürlər. Onlar hesab edirlər ki, rəsmi qurumlar artıq “rüşvətini alaraq gözünü yumublar”.
Tikintini Həyata Keçirən Şirkət Naməlumdur
Ərazidə həyata keçirilən gecə tikintisi işlərini aparan şirkət barədə heç bir məlumat yoxdur. Tikinti sahəsində məlumat lövhəsinin olmaması vəziyyəti daha da qeyri-şəffaf edir. Sakinlər bu vəziyyət qarşısında aciz qaldıqlarını bildirir və səlahiyyətlilərin yalnız tikintidə hər hansı bədbəxt hadisə baş verdikdə gözlərini açıb tikintinin qanunsuz aparıldığını bəyan edəcəklərini düşünürlər. Qeyd edək ki, gecə saatlarında aparılan tikinti işlərinin video görüntüləri mövcuddur.
