Ləğv Edilən “Gilan Holdinq”in Sirli Dirilməsi
Azərbaycan Gömrük Komitəsinin sabiq sədrləri Aydın Əliyev və Səfər Mehdiyevin vəzifədə olduqları dövrlərdə ölkədən külli miqdarda vəsait çıxardaraq, bu pullar hesabına xaricdə, xüsusilə də Türkiyədə geniş biznes şəbəkəsi qurmaları barədə iddialar mətbuatda dəfələrlə gündəmə gəlib. Aydın Əliyevin sədrliyi zamanı Bakı Şəhər Baş Gömrük İdarəsinin rəisi vəzifəsində çalışan Vüsal Novruzovun da bu vəsaitlərin ölkədən çıxarılması prosesində fəal iştirak etdiyi iddia edilir.
Son günlər keçmiş gömrük rəhbərləri və onların xaricdəki fəaliyyətləri ilə bağlı yeni məlumatlar ortaya çıxıb. Məlumata görə, 2023-cü ilin avqust ayının 30-da ləğv edilərək fəaliyyətinə xitam verilən “Gilan Holdinq”in sabiq gömrük məmurları tərəfindən yenidən canlandırıldığı bildirilir. Belə ki, adı çəkilən şəxslərin “Gilan Holdinq”in adını dəyişdirərək, onun Türkiyədə yeni bir ad altında fəaliyyətini təmin etdikləri iddia olunur.
Sabiq Məmurların Xaricdəki Yatırımları və Dəstəksizlik Tənqidi
Səfər Mehtiyev, Aydın Əliyev və Vüsal Novruzov üçlüyünün Türkiyənin Antalya şəhərində turizm və səhiyyə sektorlarına da böyük məbləğdə investisiyalar yatırdıqları, burada geniş əmlak və obyektlərə sahib olduqları qeyd edilir. İşin ən diqqətçəkən və təəssüf doğuran tərəflərindən biri isə bu şəxslərin dövlətimizin Qarabağda apardığı genişmiqyaslı quruculuq işlərinə heç bir dəstək verməməsi, bu sahəyə bir qəpik də olsun vəsait ayırmamasıdır. Vaxtilə dövlət vəsaitləri hesabına zənginləşən bu şəxslər, hazırda Qarabağın yenidənqurma prosesinə kiçik də olsa töhfə verməyi lazım bilmir, əksinə, yalnız şəxsi gəlirlərini artırmaq barədə düşünməkdə davam edirlər.
Növbəti yazılarımızda bu şəxslərin digər fəaliyyətləri, xaricdəki biznes əlaqələri və digər məqamlar barədə daha ətraflı məlumat veriləcək.
