Sabiq Məmurların Britaniya Əmlakları Satışa Çıxarıldı
Azərbaycanın sabiq MTN şefi Eldar Mahmudov və Bakı Şəhər Baş Gömrük İdarəsinin keçmiş rəisi Vüsal Novruzov Böyük Britaniyadakı daşınmaz əmlaklarını təcili şəkildə satışa çıxarıblar. Mənbələrdən daxil olan məlumatlara görə, vaxtilə büdcədən mənimsədikləri vəsaitlərlə Avropanın müxtəlif yerlərində, o cümlədən Böyük Britaniyada milyonlarla dəyəri olan mülklər əldə edən bu şəxslər, qlobal dəyişikliklərə uyğun olaraq biznes idarəçiliklərində yenidənqurma işləri aparırlar. Bu dəyişikliklərin əsas hədəfi Britaniyada alınmış mülkləri sataraq əldə olunan vəsaiti Avropanın digər ölkələrindəki daşınmaz əmlak sektoruna yönəltməkdir.
Londonun Qanunsuz Vəsaitlərə Qarşı Mübarizəsi
Hər iki sabiq məmurun Britaniya əmlaklarını satmağa qərar verməsinin səbəbi London hökumətinin qanunsuz pullara qarşı mübarizə tədbirlərini sərtləşdirməsidir. Son iki il ərzində Britaniya, aralarında azərbaycanlı sabiq məmurların və onların ailə üzvlərinin də olduğu onlarla ölkədən yüzlərlə şəxsin mülklərinə həbs qoymuş və onları dövlətin xeyrinə müsadirə etmişdir. Beynəlxalq Bankın sabiq rəhbəri Cahangir Hacıyevin həyat yoldaşı Zamirə Hacıyevanın Londondakı malikanəsinin, o cümlədən qolf meydançasının müsadirə edilməsi Londonun bu məsələdəki qətiyyətini açıq şəkildə göstərir. Bu səbəbdən Eldar Mahmudov və Vüsal Novruzov əmlak və maliyyə itkisindən qorunmaq məqsədilə Britaniyadakı varlıqlarını əldən çıxarmağa çalışırlar. Onlar hesab edirlər ki, hazırkı şəraitdə Avropanın digər dövlətləri onların kapitalı və biznesləri üçün Böyük Britaniyadan daha təhlükəsiz mühit təqdim edir.
Milli Maraqlar Və Vətənə Qayıdış Ümidi
Sabiq məmurlarımızın Britaniyadakı mülklərini müsadirədən xilas etməsi bəlkə də milli maraqlarımız baxımından arzuedilən hal ola bilər. Lakin bir şərtlə ki, bu mülklərin satışından əldə edilən vəsait Azərbaycanımızın, xüsusilə də Qarabağ və Şərqi Zəngəzur iqtisadi rayonlarının çiçəklənməsinə sərf edilsin. Azərbaycan, hər bir vətəndaş kimi, bu sabiq məmurların da vətənidir. Onlar öz dəbdəbəli həyat tərzlərini məhz bu vətənin vəsaitləri hesabına təmin etmişlər. Belə olan halda, həmin kapitalın bir hissəsinin vətənimizin abadlaşmasına sərf olunması ən təbii və məntiqli addım olardı.
Digər Sabiq Məmurların Addımları
Qeyd edək ki, son dövrlər mətbuatda yayılan xəbərlərə görə, Fövqəladə Hallar naziri Kəmaləddin Heydərovun oğlanları da İngiltərədəki bizneslərini ləğv etmişlər.
